ალეგრი: “უფრო ადვილია ითამაშო ლამაზად, ვიდრე გაიმარჯვო”

მასიმილიანო ალეგრის ინტერვიუ Tuttosport-თან…

“ჩვენ ვღელავთ? არა, ჩვენ პატივს ვცემთ “ნაპოლის”, “ინტერს” და “რომას”. “მილანმაც” დიდი სამუშაო გასწია, რომ 4-ეულისთვის იბრძოლონ, მაგრამ ახლა ისინი ცოტათი ჩამორჩებიან სხვებს. ამ სეზონში ეს 5 გუნდი იბრძოლებს ჩემპიონთა ლიგის საგზურისთვის, თუ “ლაციო” არ ჩაერია საქმეში.”

“ნაპოლი” გაიზარდა, ისინი 3 წელია ერთი შემადგენლობით თამაშობენ. “იუვენტუსი” იცვლებოდა, მაგრამ განაგრძობს გამარჯვებებს. “ნაპოლიში” ესმით, რომ ისინი ფავორიტები არიან ჩვენთან ერთად, მაგრამ ჯერ ადრეა ამაზე საუბარი. როგორც ყოველთვის, სეზონის ბედი მარტში გადაწყდება. სკუდეტოს მოსაგებად 86 ქულა იქნება საჭირო, “ნაპოლის” და “რომას” მოუწევთ გადაწერონ თავიანთი რეკორდები.”

“ატალანტასთან” მატჩში ჩვენ ლამაზი 35 წუთი ჩავატარეთ. ჩვენ 2-0 მიგვყავდა თამაში, მერე კი მოვეშვით და ნაკლები ვიმუშავეთ… ფეხბურთი მონოლითური უნდა იყოს. თვითკმაყოფილება ტიტულების დაკარგვამდე მიგიყვანს, უფრო ადვილია ითამაშო ლამაზად, ვიდრე გაიმარჯვო.”

“იგუაინი ვალდებულია უფრო გადამწყვეტი როლი ითამაშოს. არა აქვს მნიშვნელობა 25-ს გაიტან, თუ 30-ს, მთავარია ეს იყოს გადამწყვეტი გოლები. ის ახლა უკეთეს ფორმაშია. სანაკრებო პაუზისას ის განუწყვეტლივ ვარჯიშობდა, მაგრამ ჯერ კიდევ 100%-ით არაა მზად, ახლა ის თავის შესაძლებლობის მხოლოდ 50% აჩვენებს.”

“დიბალა საუკეთესოა ვინც გამიწვრთნია? ძნელია შეადარო, რადგან ყველა სხვადასხვა პოზიციაზე თამაშობს. მე გამიმართლა, რომ ვმუშაობდი პირლოსთან, რომელსაც სხვა როლი ჰქონდა, მაგრამ იყო უდიდესი ტალანტი. რონალდინიოს ტალანტიც ნორმის ფარგლებს სცდებოდა, ერთხელ “ბარსელონას” წინააღმდეგ თამაშში “კამპ ნოუ” მთელი ათი წუთი უკრავდა მას ტაშს. ასევე მყავდა კასანო, რობინიო და იბრაჰიმოვიჩი, რომელსაც თავისებური ტალანტი აქვს, მაგრამ განსხვავდება სხვებისგან.”

“დიბალა 23 წლისაა, ის ვალდებულია გაიზარდოს სერიოზულად, შარშანდელთან შედარებით ის შეიცვალა ფიზიკურად. მან უნდა ისწავლოს, როგორ მიუდგეს თამაშებს, რადგან ზოგ მათგანში მას ცოტა ენერგია შერჩა. მან უნდა ისწავლოს ენერგიის განაწილება და შეარჩიოს მომენტი, როცა საჭიროა აფეთქება. ასევე მან უნდა იმუშაოს მარჯვენა ფეხზე, ეს ასევე ეხება ბერნარდესკის, თუ არადა ისინი დარჩებიან ცალფეხად. ისინი უნიჭიერესი ბიჭები არიან. ბერნარდესკიმ კარგად ითამაშა ბერგამოში, მაგრამ ის გომესზე არ უნდა დაჯარიმებულიყო, მას ახლოს უნდა აეყვანა ის და გაეჩერებინა. ყველა ეს დეტალი განაპირობებს მატჩის შედეგებს.”

“იუვენტუსში” ყველა თამაში მნიშვნელოვანია. საშუალო გუნდში შენ შეგიძლია 2-ჯერ გაკეთო კარგი რამ და 8-ჯერ შეცდე, იქ მხოლოდ კარგზე ისაუბრებენ და არავინ ილაპარაკებს 8 შეცდომაზე. “იუვენტუსში” ყველაფერს ითვლიან, ბერნა ტალანტია, მაგრამ ის გაცილებით უკეთესი უნდა გახდეს, რომ დიდ გუნდში რეგულარულად ითამაშოს ძირითადში. დიდ გუნდში უნდა იმარჯვებდე, ხასიათის ასპექტები ფუნდამენტურ ხასიათს ატარებს. ზოგჯერ შემიძლია ვთქვა – ეს კარგია, მაგრამ არასაკმარისია მოგებისთვის.”

“რუგანი სერიოზულად გაიზარდა, მაგრამ მან უნდა გადადგას ბოლო ნაბიჯი. მე კმაყოფილი ვარ მისით და არ ვაქცევ ყურადღებას, რომ ის ჯერ კიდევ ახალგაზრდაა. ის სწრაფია და ძნელია მას გასცდე, მაგრამ მან უნდა დახვეწოს პოზიციური თამაში ერთი-ერთზე.”

“დუგლას კოშტა გამოცანა არაა, როცა ის ბურთს იღებს, მნიშვნელოვანი მოთამაშე ხდება, ის ყოველთვის ერთი-ერთზე თამაშობს. მან უნდა აკრიფოს ფორმის 100%, ახლა ის მხოლოდ 60% იმყოფება. როდესაც შენ თამაშობ “ბავარიაში” ან “იუვენტუსში”, თავს ნორმაზე მეტი უნდა მოსთხოვო. დუგლასმა საკუთარი თავის თუ ირწმუნა, მაშინ… მამმა მია.”

“რეალი” ჩემპიონთა ლიგის მთავარი ფავორიტია. ისინი ცოტა მოეშვნენ და ქულები დაკარგეს, მაგრამ შედეგ სწორი ნაბიჯები გადადგეს, დორტმუნდში “ბორუსიასთან” 70% აჩვენს და მოიგეს. “ბარსელონას” ჰყავს მესი, რომელიც ქმნის სხვაობას. პსჟ ახლა გაურკვეველია, მაგრამ მათ ჰყავთ ნეიმარი, მბაპე, კავანი, ალვეში… ვნახოთ მარტისთვის რა გუნდი დადგება.”

“მაკლია თუ არა ალვეში? ის ძლიერი ფეხბურთელია, ტექნიკური, რომელმაც ჩვენთან დიდი როლი ითამაშა გასული სეზონის მეორე ნახევარში. ბონუჩი? ის საჭირო მოთამაშე იყო, მაგრამ “იუვენტუსის” ისტორია მარტივია, ბევრი მნიშვნელოვანი ფეხბურთელი ტოვებდა გუნდს. ბერლინის შემდეგ, პირლოს, ტევესის, ვიდალის წასვლის გათვალისწინებით, თითქოს “იუვენტუსი” დამთავრდა, მაგრამ ამის ნაცვლად ჩვენ გადატვირთვა მოვახდინეთ. იგივე ეხება პოგბას და მორატას წასვლას. კლუბმა შესანიშნავი სამუშაო გასწია.” 

“ღიმილს მგვრის ზოგიერთის სიტყვები, რომლებიც ამბობენ, რომ თამაშებს მწვრთნელები იგებენ ტაქტიკური სქემების წყალობით. ყველა ფეხბურთელი თანაბარი რომ იყოს, პსჟ ნეიმარში 222 მილიონს არ გადაიხდიდა, მესი 21 მილიარდი არ ეღირებოდა, დიბალა კი 170 მილიონი. შენ შეგიძლია რამე გეგმები გქონდეს, მაგრამ ბოლობოლო არის ბურთი და შენ მასთან კარგად უნდა მეგობრობდე, სხვანაირად კლუბები არაფერს არ დახარჯავდნენ.”

“კალათბურთში “ლეიკერსი” და “ფილადელფია” იგებდნენ, რადგან “ლეიკერსს” მეჯიკ ჯონსონი ჰყავდა, ხოლო “ფილადელფიას”- იულიუს ირვინგი. პატივისცემის მიუხედავად, “ლეიკერსში” ანდრეა სკოკერას რომ ეთამაშა “პალაკანესტრო ლივორნოდან”, რომელსაც არასოდეს ჩაუგდია ბურთი კალათში… მე რომ მეთამაშა “ბარსაში” მესის ნაცვლად, ისინი ვერ მოიგებდნენ ვერცერთ ჩემპიონთა ლიგას.”

“როგორია წვრთნიდე მანჯუკიჩს? ის მაიძულებს ვიცინო. მას კარგად ესმის იტალიური, მაგრამ არ უნდა ეს აჩვენოს, რადგან მას არ უნდა, რომ ელაპარაკონ იტალიურად. მარიო ცბიერია.”