დელ პიერო: ზაფხულში “იუვე” ლიდერი იქნება იტალიაში და ევროპაში

დელ პიეროს ინტერვიუ  Gazzetta dello Sport-თან.

“ბარსასთან” ფრე შეიძლება წარუმატებლობად ჩავთვალოთ? კი, მაგრამ ეს გათვლილი იყო. მესმოდა, რომ ფრე და წაგება ერთმანეთის ექვივალენტური იქნებოდა, მაგრამ სინამდვილეში ეს ასე არაა, ახლა “სპორტინგს” მხოლოდ მოგება სჭირდება, “იუვეს” არა. ქულის აღება “იუვესთვის” მნიშვნელოვანი იყო მორალური თვალსაზრისით.

ეპოქის დასასრული? ამდენი წარმატების შემდეგ კმაყოფილების გაუცნობიერებელი გრძნობა – კოშმარია ნებისმიერი მწვრთნელის და ფეხბურთელისთვის. უფრო ადვილია დაუნდობელი და კონკურენტუნარიანი იყო წაგების შემდეგ, თუმცა ამ თვისებებს ყოველთვის ვხედავდი “იუვეში”.

5 გოლია გატანილი 5 შეხვედრაში? ეს ალეგრის ერთ-ერთი პრობლემაა. ეს “იუვე” აწყობილია გაიტანოს ერთით მეტი მოწინააღმდეგეზე და გაუშვას ერთით ნაკლები. შესაძლოა ახალ მოთამაშეებს დრო სჭირდებათ. ზოგჯერ, როდესაც დიდ გზაზე უნდა გახვიდე, გვირაბშიც უნდა გაიარო. პირველად არაა “იუვე” არაშთამბეჭდავად რომ თამაშობს შემოდგომაზე, თუმცა გუნდი ფორმას გაზაფხულისთვის აკრეფს. ამიტომ ველი, რომ “იუვე” ლიდერი იქნება იტალიაში და ევროპაში.

“ნაპოლი”, “ოლიმპიაკოსი” და “ინტერი” ერთ კვირაში? ეს ჭეშმარიტების მომენტია, “იუვეს” სჭირდება ასეთი ბიძგი. ახლა მათ სჭირდებათ 2 თუ 3 თამაში, რომ იგრძნონ გზის სისწორე. ალეგრი ელოდა ასეთ მომენტს.

დიბალა? მან ძალიან კარგად ითამაშა “ბარსას” წინააღმდეგ, ის ერთადერთი იყო, რომელმაც გააოცა “ბარსელონა”. ის იჭერდა ბურთს, იღებდა ჯარიმებს და თითმის გაიტანა ბოლო წუთებზე. დიბალა მალე იპოვის საჭირო ბალანსს თავის თამაშში.

იტალიის ვერ გასვლა მსოფლიო ჩემპიონატზე? გული დამწყდა, როცა ატირებული ბუფონი ვნახე. ჯიჯიმ კიდევ ერთხელ აჩვენა თავისი სიდიადე. ჩემი ერთ-ერთი ყველაზე დიდი სურვილი ამიხდა 1982 წელს, მაშინ 8 წლის ვიყავი. ჩვენ ჯერ კიდევ ვერ გავაცნობიერეთ ჩვენი გავარდნა, მაგრამ ამ დონეზე იმყოფება ჩვენი ფეხბურთი.

კალჩოპოლი? სკანდალი ატომურ აფეთქებას გავდა, მაშინ დაინგრა ჩვენი ფეხბურთი. მე ახლა მხოლოდ “იუვენტუსზე” არ ვლაპარაკობ. სკანდალის შემდეგ ბევრი ჩემპიონი წავიდა საზღვარგარეთ,  სხვა ქვეყნებმა კი გეომეტრიული პროგრესიით დაიწყეს განვითარება.

პრემიერლიგა აფეთქდა მენეჯმენტის უნარის წყალობით, მათ შეძლეს მრავალი ბრენდის კონტროლის აღება მთელს მსოფლიოში, ასევე მოახერხეს ტვ-უფლებების კომპეტენტურად გადანაწილება. “რეალმა” და “ბარსელონამაც” წინ წაიწიეს კორპორატიული პოლიტიკის წყალობით. გერმანიამ წარმატებით დაასრულა დაწყებული საქმე, რის შედეგადაც მოიპოვეს 2006 წლის მსოფლიო ჩემპიონატის ჩატარების უფლება. საფრანგეთშიც კი მივიდნენ სერიოზული ინვესტორები, რამაც “პსჟ”-ს და “მონაკოს” ტრანსფორმაცია გამოიწვია. იტალია, თავის მხრივ, დაინგრა. “იუვე” გამოვიდა ამ მდგომარეობიდან და დაიწყო აღორძინება, ხოლო  “ნაპოლი” ძალიან მნიშვნელოვან გზაზე დგას.