ნედვედი: “ნორმალური კენჭისყრაა”

“იუვენტუსის” ვიცე-პრეზიდენტი  პაველ ნედვედი, კენჭისყრის შედეგებს აფასებს.

“ნორმალური კენჭისყრაა. ევროპაში “ტოტენჰემს” ჯერ არ შევხვედრილვართ, ამხანაგურში კი ამ ზაფხულს წავაგეთ. თამაში ორი თვის შემდეგ გაიმართება, ასე რომ ვნახოთ, როგორ წარიმართება საქმე.

ჩვენ ვლაპარაკობთ კარგ გუნდზე, რომელსაც შესანიშნავი მწვრთნელი ჰყავს და კარგად იყენებს გუნდის შემტევ პოტენციალს. გარდა ამისა, მათ ჰყავთ ლორენტე, რომელსაც ჩვენ კარგად ვიცნობთ. იმედია ის ვერ შეძლებს დაგვამწუხროს, როგორც ეს ესპანეთში გააკეთა. ამხანაგური შეხვედრისას ჩვენ არ ვიყავით კარგ ფორმაში, ახლა კი ჩვენ გვჯერა ჩვენი თავის და ვეცდებით საუკეთესო თამაში ვაჩვენოთ.

ვისურვებდი “იუვე” ყოველ წელს გადიოდეს ფინალში, იქ კი ვნახავთ გავიმარჯვებთ თუ არა. ეს რთული ამოცანაა, მაგრამ “იუვენტუსმა” ეს ბოლო სამ წელიწადში ორჯერ მოახერხა. ყველას არ შეუძლია მსგავსის გაკეთება.

1/8 ფინალები ყოველთვის რთულია, ძნელია დასძლიო მოწინააღმდეგე. თავისთავად, თითქოსდა ცხადია, მაგრამ “იუვენტუსი” არსდროს ფიქრობს ამაზე, არც ჩემპიონატში და არც ევროპაზე. ჩვენ ყოველთვის უახლოეს თამაშზე გვაქვს ორიენტაცია, ამიტომ “ტოტენჰემზე” მაშინ დავიწყებთ ფიქრს, როცა ამის დრო მოვა, მანდ კი ვნახავთ რაც მოხდება.

დიბალა? ის 24 წლისაა და ნორმალურია, რომ მასაც აქვს აღმაფრენა და დაღმასვლა. მან იცის, რომ კლუბი ყოველთვის მხარში დაუდგება. ჩვენ ყოველთვის მზადა ვართ, რომ დაველაპარაკოთ და დავეხმაროთ, თუ ამის საჭიროება გაჩნდა. მას ბევრი მსხვერპლის გაღება მოუწევს ცხოვრებაშიც და მოედანზეც, რომ თავის მაქსიმალურ დონეს მიაღწიოს.

ალეგრი ყველას თანაბრად უდგება. მანჯუკიჩი ან იგუაინი თუ ფორმაში არ არიან, სათადარიგოთა სკამზე მოუწევთ ჯდომა. მოედანზე გადიან ისინი, ვინც სრულიად მზად არიან და ესაა ყველაზე მთავარი.”