ალექს სანდრო – “მანჩესტერ იუნაიტედის” პრიორიტეტი

daily mail-ის ცნობით “მანჩესტერ იუნაიტედმა” დაცვის გაძლიერების მიზნით ზაფხულში “იუვენტუსის” მცველის ალექს სანდროს შეძენა პრიორიტეტად დაისახა.

ჟოზე მაურინიო მზად არის ბრაზილიელში “ჩელსის” შეეცილოს და დიდი თანხაც გაიღოს.

შეგახსენებთ, რომ ალექს სანდროს “იუვენტუსმა” გაუმჯობესებული ახალი კონტრაქტი შესთავაზა, თუმცა როგორც ჩანს, ბრაზილიელმა მცველმა ტურინის დატოვება საბოლოოდ გადაწყვიტა. კლუბის პოლიტიკიდან გამომდინარე, “იუვენტუსი” ძალით არ ეცდება დააკავოს მოთამაშე, თუმცა ამ საქმიდან მაქსიმალური სარგებელის მიღებას ეცდება.

სანდროს შეძენას გასულ ზაფხულს აქტიურად ცდილობდა “ჩელსი” და 70 მილიონი ევროს გადახდასაც აპირებდა, მაგრამ მაშინ კლუბმა მოახერხა მისი შენარჩუნება. ანტონიო კონტე ცდილობს დასწრებაზე წავიდეს და ბრაზილიელი ზამთარშივე გადაიბიროს, რადგან სანდროს შეძენით რამდენიმე კლუბია დაინტერესებული, “მანჩესტერ იუნაიტედის” გარდა მისი შეძენა ასევე სურთ პსჟ-ს და “სიტის”. მაგრამ “იუვენტუსი” არ აპირებს მის გაშვებას ზამთარში.