ფეხბურთელების შეფასებები

ტურინელებმა მორიგი წარუმატებლობა განიცადეს და ამჯერად პრობლემებს ვერონასთან შეხვედრაში წააწყდნენ.

ანდრეა პირლოს შეგირდებმა კი გახსნეს ანგარიში, მაგრამ საქმის გამარჯვებამდე მიყვანა ვერ მოახერხეს და ფრეს დაჯერდნენ.

გთავაზობთ ტრადიციულ შეფასებებს:

შესნი – 6.5 – გაშვებულ ბურთთან უძლურია, თუმცა სხვა შემთხვევებში აბსოლუტურად კონცენტრირებული და საიმედოა.

დემირალი – 5.5 – კარგად იწყებს, მაგრამ რაც დრო გადის პრობლემები მატულობს. გოლიც მისი ზონიდან გავიდა.

დე ლიხტი – 6.5 – განსხვავებით თურქისგან, მატეისი კარგად იწყებს, მშვენივრად აგრძელებს და უშეცდომოდ ასრულებს. მისი ზონიდან თქვენ კარგი არაფერი გელოდებოდათ.

ალექს სანდრო – 6 – ნახევარი ქულით ნაკლები გოლის ეპიზოდის გამო. სხვა მხრივ საიმედოდ მოქმედებდა.

კიეზა – 6 – ანალოგიურად დააკლდა ნახევარი ქულა. საგოლე გადაცემა რონალდუზე, მაგრამ ამ წამიდან მოყოლებული ქრება.

რაბიო – 5.5 – პოზიციას და ზონას ხშირად კარგავდა.

ბენტანკური – 5.5 – ტრადიციულად რეჯისტას როლშია და აბსოლუტურად ვერ უმკლავდება დაკისრებულ მოვალეობას. იქნებ დაფიქრდეს პირლო და მას სხვა ამპლუაში ხილვა შევძლოთ.

რემზი – 6 – ორი იდეალური შანსი ქონდა გოლის გასატანად, მაგრამ ვერცერთხელ ვერ მოახერხა მიზნის მიღწევა.

მაკენი – 6 – 68 წუთიდან – შემოდის, რათა არსებული ქაოსი დაარეგულიროს, მაგრამ ამ საქმიდან მხოლოდ ნახევარი თუ გამოდის.

ბერნარდესკი – 6.5 – კარგი მატჩი, ბევრი შავი სამუშაო და გუნდისთვის მსხვერპლის გაღება.

კულუსევსკი – 6 – თამაშობს და ბჟუტავს.. პერიოდულად ანათებს. მისგან მეტს ელიან.. გაცილებით მეტს!

რონალდუ – 6.5 – ინთავისუფლებს თუ არა პოზიციას, ბურთს მომენტალურად კარისკენ აგზავნის. კარიერაში ალბათ ყველაზე იოლი გააქვს. თუმცა, გუნდს ეს არ ყოფნის.