იტალია – თურქეთი (ფეხბურთელების შეფასებები)

იტალიელებმა ევროპის ჩემპიონატის პირველ მატჩში თურქები დამაჯერებლად 3-0 დაამარცხეს.

ახლა კი გთავაზობთ ტრადიციულ შეფასებებს:

დონარუმა – 6.5 – თამაშის უდიდესი ნაწილი მაყურებლის რანგში გაატარა, მაგრამ საჭიროების შემთხვევაში კონცენტრირება წამითაც არ დაუკარგავს.

ფლორენცი – 5.5 – მშობლიურ არენაზე მისგან ალბათ უფრო აქტიურ თამაშს ელოდნენ.. თუმცა, შესაძლოა პრობლემა ფიზიკურ კონდიციებში იყო.

დი ლორენცო – 46 წუთიდან – 6 – მასთან ერთად იტალიამ ტემპი შეცვალა.

ბონუჩი – 6 – სერიოზული საქმე დაცვის ცენტრალურ ზონაში არ ქონია, მაგრამ ლეოს სოლიდურობა ყველგან იგრძნობოდა.

კიელინი – 7 – ილმაზი გააქრო მოედნიდან.. თურქები ისეთი წნეხის ქვეშ იყვნენ, რომ ჯორჯო შეტევაშიც თამამად მიდიოდა.

სპინაცოლა – 7 – ეფექტური, აქტიური, ინტენსიური.. ერთადერთი გადაცემები ტოვებს უკეთესის სურვილს, მაგრამ მეორე გოლი მის მოქმედებას მოყვა და მატჩის შემდეგ დამსახურებლად გახდა საუკეთესო მოთამაშე.

ბარელა – 7.5 – იტალიამ მეორე ტაიმში ტემპის ცვლილება დიდწილად ბარელას აქტიური ჩართულობით შეძლო. არცერთი ბურთი არ გასულა ისე, რომ მას მონაწილეობა რაღაც დოზით არ მიეღო. შავი სამუშაოც საკმაო რაოდენობით შეასრულა.

ჟორჟინიო – 7 – ჩემპიონთა ლიგის შემდეგ ჩელსის შუახაზელი საკუთარ სტატუს ევროპის პირველობაზეც ადასტურებს.

ლოკატელი – 6.5 – შუახაზიდან ყველაზე მეტად მას ეტყობოდა, რომ მსგავს მატჩებში მონაწილეობის გამოცდილება არ გააჩნდა. თუმცა, ეტაპობრივად მოიპოვა სიმშვიდე და შესაბამისი ხარისხიც უზრუნველყო.

ბერარდი – 7 – მოკრძალებული პროვინციული კლუბიდან, ევროპის ჩემპიონატზე ეროვნული ნაკრების მაისურით! ეს მისი ზღაპარია. მისი აქტიურობით გაიტანა დემირალმა გოლი საკუთარ კარში.

იმობილე – 7 – ფლორენცისგან განსხვავებით იმობილეს რომში თავი არ შეურცხვენია. პირველ ტაიმში ბევრი ბრძოლა იყო, რადგან თურქების კედლის გავლა იოლი არ არის. მეორე ტაიმში გოლის გატანა მაინც მოახერხა და ათვლაც დაიწყო.

ინსინიე – 7 – ანალოგიურად ბევრი ბრძოლა, რამდენიმე არაზუსტი დარტყმა და გადაწყვეტილება. თუმცა, რადიკალურად იცვლება მეორე 45 წუთში და ბონუსად ეფექტური გოლიც გააქვს.

მანჩინი – 7.5 – გამარჯვებულის მენტალიტეტი მუდამ გააჩნდა და საკუთარ შეგირდებსაც იგივე გაუზიარა.