რავანელი: “იუვენტუსის დატოვება ჩემი ცხოვრების შეცდომა იყო”

Grand Hotel Sitea-ში, სადაც 90-იანებში “იუვენტუსი” იკრიბებოდა, რავანელიმ წარსული გაიხსენა, ჯანლუკა ვიალიზე ისაუბრა და კლუბის დღევანდელობას, კერძოდ ლუჩანო სპალეტის მუშაობას გაუსვა ხაზი.

ვიალი — მისტიკური ფიგურა და მეგობარი რავანელიმ ემოციურად გაიხსენა ჯანლუკა ვიალი, რომლის დაკარგვაც მისთვის უმძიმესი დარტყმა იყო.

“ვიალი ჯგუფისთვის ყველაფერი იყო. მახსოვს, პერუჯაში ვიყავი, სერია C-ში ვთამაშობდი, როცა პირველად შევხვდი. მან თავისი ბუცები მაჩუქა, რაც ჩემს ცხოვრებაში ერთ-ერთი ყველაზე ბედნიერი მომენტი იყო. შემდეგ კი ერთ გუნდში და ერთ ოთახშიც კი ვცხოვრობდით. მას საოცარი პიროვნება ჰქონდა, წნევასთან გამკლავების უნიკალური უნარი გააჩნდა.”

რავანელი კონტეს ვიალის ადარებს.

“ვიალის მსგავსი ქარიზმა მხოლოდ დელ პიეროში, ბუფონსა და კიელინიში დავინახე. ანტონიო კონტესაც ჰქონდა ასეთი მასშტაბი, თუმცა ვერასდროს წარმოვიდგენდი, რომ ის ასეთი ძლიერი მწვრთნელი გახდებოდა. კონტე მუდამ ‘ჩაქუჩივით’ იყო, მაგრამ არ მეგონა, თუ კარიერის დასრულების შემდეგ მწვრთნელობაზე იფიქრებდა.”

“რატომ არ გამოვიდა ჩემგან კონტეს ნაირი მწვრთნელი? იმიტომ, რომ ბევრი არასწორი არჩევანი გავაკეთე. ‘აიაჩოში’ მუშაობა შეუძლებელი იყო, კიევის ‘არსენალში’ კი კლუბის გარეშე აღმოვჩნდი. დღეს უკვე, როგორც ფუნქციონერი, თავს გაცილებით კომფორტულად ვგრძნობ.”

უდიდესი სინანული — რატომ დატოვა ტურინი? იტალიელმა ვეტერანმა გულახდილად ისაუბრა კარიერის ყველაზე მტკივნეულ გადაწყვეტილებაზე — 1996 წელს “იუვენტუსის” დატოვებაზე.

“სიმართლე ერთია: იუვენტუსიდან წასვლა ჩემი ცხოვრების ყველაზე დიდი შეცდომა იყო. მაშინ ემოციებით ვიმოქმედე, თავი მოტყუებულად ვიგრძენი ხელმძღვანელობის მხრიდან. უმბერტო ანიელი მპირდებოდა, რომ კაპიტანი გავხდებოდი, შემდეგ კი გაყიდვა გადაწყვიტეს. მიდლსბროში გადასვლა მხოლოდ შურისძიების წყურვილით გადავწყვიტე, რაც არასწორი იყო.”

სპალეტი და “იუვენტუსის” ახალი ერა რავანელი კატეგორიულია, როცა საუბარი ლუჩანო სპალეტის ეხება. მისი აზრით, ტოსკანელი სპეციალისტი კლუბისთვის იდეალური ფიგურაა.

“სპალეტიმ იუვენტუსი შეცვალა. დღეს სხვა მწვრთნელს ვერც კი ვხედავ. ის ამ გემის კაპიტანია. მისი კონტრაქტი ივნისში იწურება? სასწრაფოდ უნდა განაახლონ. სპალეტი კონტინასას ჭიშკარზე უნდა მიაბან, მის გარეშე იუვენტუსი ვერ წარმომიდგენია.”

რჩევა ილდიზს და შეტევის პრობლემები ვეტერანმა ფორვარდმა კენან ილდიზს ურჩია, არ გაიმეოროს მისი შეცდომა.

“ილდიზი ტოპ დონის მოთამაშეა, იმედია ბაჯოს ან დელ პიეროს დონეს მიუახლოვდება. მან არ უნდა გააკეთოს ის, რაც მე გავაკეთე. აქ ის შეიძლება კერპი გახდეს, რეალში ან სიტიში კი — ერთ-ერთი რიგითი.”

რაც შეეხება ჯონათან დევიდსა და ლოის ოპენდას სირთულეებს, რავანელიმ მოკლედ განმარტა:

“ტურინში ბურთი უფრო მძიმეა, ვიდრე ლილსა ან ლაიფციგში. ვისაც პიროვნული სიმტკიცე არ აქვს, აქ ვერ ითამაშებს.

ჟან-ფილიპ მატეტა? კი, მომწონს, მაგრამ ნუ დავივიწყებთ ერთ რამეს: ‘კრისტალ პალასში’ თამაში გაცილებით მარტივია, ვიდრე ‘იუვენტუსში’. შეფასებებში ფრთხილი ვიქნებოდი. ხომ ხედავთ, რა სირთულეები აქვს ჯონათან დევიდს? ტურინული წნეხის გაძლება ყველას არ შეუძლია.”