ბიანკონერები ეროვნულ ნაკრებებში ასპარეზობენ

ევროპის ჩემპიონატი და კოპა ამერიკა ახლოვდება, ეროვნული ნაკრებები კი საერთაშორისო ფორუმებისთვის მზადებას განაგრძობენ.ბოლო დღეების განმავლობაში რამდენიმე ამხანაგური მატჩი გაიმართა, რომელში მონაწილეობაც ტურინის “იუვენტუსის” ფეხბურთელებმაც მიიღეს.

იტალიის ეროვნული ნაკრებით დავიწყოთ – ანტონიო კონტეს შეგირდები გუშინ მალტაში შოტლანდიის ნაკრებს დაუპირისპირდნენ და 1-0 დაამარცხეს, სკუადრა აძურას ძირითად შემადგენლობაში ერთბაშად 4 იუვენტინო გახლდათ – ჯიჯი ბუფონი, ლეონარდო ბონუჩი, ჯორჯო კიელინი და ანდრეა ბარძალი, ოთხივე მათგანმა მინდორზე 90 წუთი დაჰყო.რაც შეეხება სიმონე ძაძას, იგი მოედანზე 67′ წუთზე ჩაერთო და გოლის ავტორი, გრაციანო პელე შეცვალა.

ესპანეთის ნაკრებმა ბოსნია ჰერცოგოვინა დაამარცხა 3-1, თუმცა ალვარო მორატა არც ძირითად შემადგენლობაში და არც სათადარიგოთა სკამე არ გამოჩენია, სავარაუდოდ, ვისენტე დელ ბოსკემ მას დასვენების საშუალება მისცა.იგივე სიტუაციაში აღმოჩნდა მარიო მანჯუკიჩიც, ხორვატებმა მოლდოვას 1-0 მოუგეს, სუპერ მარიო კი მინდორზე აღარ გამოჩენილა.

შვეიცარიის ნაკრებმა 28 მაისს ბელგიასთან წააგო 1-2, შტეფან ლიხტშტაინერი თადარიგში იმყოფებოდა და მოედანზე არ შემოსულა, მთავარმა მწვრთნელმა გუნდის ახალ კაპიტანს დასვენების შანსი მისცა.

მოულოდნელი მარცხი განიცადა გერმანიის ნაკრებმა, რომლის შემადგენლობაშიც სამი ხედირა ასპარეზობს.ბუნდესტიმი სლოვაკეთის ნაკრებთან დამარცხდა, 1-3.სამი ძირითად შემადგენლობაში იმყოფებოდა და პირველი ტაიმი ითამაშა, 46′ წუთზე იგი იულიან ვეიგლმა შეცვალა.

კოლუმბიის ეროვნულმა გუნდმა 3-1 მოუგო ჰაიტის, ხუან კუადრადომ მინდორზე 65 წუთი დაჰყო და გოლიც გაიტანა, ფრეზე მისი გუნდი დააწინაურა.მარჯვენა ფლანგელი კოპა ამერიკისთვის ემზადება.

რაც შეეხება დანი ალვეშს, რომელიც სულ მალე უნდა გახდეს “იუვეს” წევრი, ბრაზილიამ პანამა დაამარცხა 2-0, 33 წლის მარჯვენა მცველი კი ძირითადში იმყოფებოდა და ყვითელი ბარათიც მიიღო.

დღეს ღამით კი, პირველ ამხანაგურ შეხვედრას ევროპის ჩემპიონატის მასპინძელი ნაკრები, საფრანგეთი გამართავს კამერუნის წინააღმდეგ.დიდი ალბათობით, სასტარტო შემადგენლობაში იქნებიან პოლ პოგბა და პატრის ევრა.